香港作為一個廢物回收中轉站，家陣大難臨頭嘞，事關內地政府今年二月開始實施持續十個月嘅「綠籬」行動，主要目的係嚴格禁止「洋垃圾」進口。洋垃圾嘅意思係境外產生嘅電子垃圾、生活垃圾、醫療垃圾、殘舊衣服以及工業礦渣等等，洋垃圾由於未清潔又未分類，所以夾雜無法循環再造嘅廢物，進口會破壞內地環境。
聽講喎，內地海關今次嘅行動特別針對香港，文件標明「特別關注通過香港『轉運』、『拼櫃』等方式夾藏『洋垃圾』的進口固體廢物」。咁就出事嘞，本地回收商愁眉深鎖，唔少以往可以運去內地嘅廢物統統被拒諸門外，苦無出路嘅廢物堆積如山滯留回收場。回收商認為內地海關矯枉過正，香港回收嘅物料之中只要夾雜極少量生活垃圾，例如食物殘渣，一律當作洋垃圾禁止入境，受影響最大嘅係回收廢膠。
業界人士指出，四百個回收商已經停止回收廢膠，超過十個回收場陷入半停業狀態。若然情況持續落去，將會發生乜嘢事呢？冇錯嘞，原本運去內地作為工業原材料嘅垃圾將會流入並且塞爆堆填區！
有立法會議員要求環保署盡快同內地部門溝通，建議特區政府推出認證制度，將真正嘅回收物料同洋垃圾區分，避免內地部門誤判，令回收業及早脫困，同時避免堆填區不勝負荷。
計功夫茶話齋，環保署同內地部門溝通固然重要，其實有一件事不可不知，成件事嘅關鍵係在於「垃圾冇分類」。好似一間大型紙料回收場嘅經理咁講吖，佢哋暫時未受到相關政策影響，原因係公司規模較大，清潔分類仔細，垃圾執得乾乾淨淨，自然能夠順利過關。香港政府回收政策似有若無，市民分類垃圾粗疏，中小型回收場要將垃圾執乾淨有一定難度。業界人士認為，內地收緊廢物進口嘅政策，綠籬行動鼓勵執清廢物同源頭分類，長遠而言對於保護內地環境以及提高香港出口廢物嘅質素有幫助。
喂，明唔明呀？垃圾只要做好分類工作，內地海關係唔會留難o架。換言之，環保署最應該做嘅係推動廢物分類，否則堆填區好快就爆棚嘅喇。
廢物分類應該從源頭做起，之但係好可惜，港式官僚至今未曾確立行之有效嘅相關政策，淨係喺街邊放幾個裝模作樣嘅分類垃圾桶。之所以話係裝模作樣，原因係分類垃圾桶一來數量唔多，二來咯喎，缺乏監管之下唔少所謂已分類嘅垃圾照樣送去堆填區，完全失去應有嘅意義。
嗱，環境局局長黃錦星係時候做嘢喇，閣下都唔想淪為一事無成嘅官場垃圾啩。