每逢立會有大事，如特首發表施政報告或者答問大會，立法會保安都會嚴陣以待，喺示威區同會議廳保障官員安全同隔開示威者。而喺立法會冇會開嘅時候，保安員就會負責整座大樓保安。
但據聞立法會保安依家每日工作除咗要巡樓同維持秩序外，仲要包括巡視各個樓層嘅洗手間，唔通秘書處以為有不法分子會喺立法會洗手間發動襲擊，所以要啲保安(目及)到實一實？
立法會中人放風，秘書處之所以要保安巡視各樓層嘅洗手間，並唔係因為立法會唔夠錢請清潔工，而係想佢哋幫手檢查洗手間內嘅紅外線沖水器同洗手液機有冇壞。雖然洗手間清潔工作應該係由清潔工負責，但器材維修就係由秘書處轄下嘅樓宇管理組負責。如果清潔工人發現洗手間內有任何機件故障，就會喺做完嘢後向主管報告，再由主管傳達畀樓宇管理組，相當繁複。聽聞秘書處覺得咁樣做效率唔算太高，於是改為要求保安幫手檢查，一發現有唔妥就可以即刻通報，等秘書處可以快快手整番好佢。秘書處咁做雖然係醒，但係保安員要巡廁所，有啲怪囉。