唔少建制派對「佔領中環」行為有所保留，仲打晒開口牌話擔心佔中會引起混亂，不過佢哋點講，都唔及一國兩制研究中心總裁、行政會議成員張志剛用求婚比喻佔中咁特別。張志剛尋日出席網台節目，話現時中央同泛民雙方都想盡最大努力傾成政改方案，但依家中央傾都未傾，泛民就出到佔中呢招，會畀人覺得香港人想用佢嚟要挾北京。張志剛愈講愈興奮，仲話求婚理應係送花送戒指，但如果男方攞把刀出嚟，同女方講「你唔嫁我就拮你」，會令女方覺得男方係嚇緊自己，肯定唔會接受男方嘅求婚喇。
