政情：公民講場：收禮急脫手難保下一鑊

周一嶽接任平等機會委員會主席冇耐，即大模廝樣收受由商業機構送出，估值約一萬元嘅Samsung Galaxy S4新款智能手機連兩年服務合約。周一鑊起初仲死撐自己收禮跟住指引，喜孜孜咁聲稱拎返去平機會抽獎，貪到出晒面，點知畀全城聲討。日前佢突然知衰急轉軚，改口話會將禮物捐出，費事擺部電話喺平機會半年嘥晒咁話。佢忽然自知收禮物踢到個蟻竇，今次仲唔一身蟻？所以至急於將禮物捐出但求脫手。周一鑊咁無警覺性，就算今次畀佢甩到手，都仲會衰多一鑊又一鑊啦。