立法會裏面要搞潮汕人士同鄉會，數數埋原來都有唔少人合資格入會。身為潮州「家己冷」嘅民建聯陳鑑林（橄欖）發起暑假潮汕四日遊活動，打算睇勻當地風景兼食盡地道美食，只限議員及其家屬參加。
其實橄欖喺三年前已經試過同前金融服務界議員詹培忠（金勞詹）發起潮汕美食之旅，當時金勞詹包起所有旅客大部分旅費。金勞詹今屆唔再係議員，潮汕團今次冇咗條大水喉，盤川旅費就要貴客自付啦。
三年前嘅潮汕美食之旅一共玩足三日兩夜，一行人先後走訪汕頭、潮州、揭陽及惠州大亞灣，除咗參加各地市政府為佢哋安排嘅官式宴會之餘，仲把握時間周圍去搜羅地道美食，例如牛丸、滷水鵝肝、潮州粥等，食到幾乎個個都要捧住個肚返香港。今次內地興簡約，可能唔會再難為議員個肚。
橄欖話今年想留多一日玩埋澄海同饒平，又話已經搵咗專門設計旅遊套票嘅旅遊界議員姚思榮幫手設計行程，相信一定會比以前更加精彩。橄欖嘅黨友陳恒鑌、葛珮帆已經一早報名參加，依家只要等埋旅行社報價就可以正式成團。