政情：英姐退休逍遙自在
勞工界前立法會議員李鳳英卸任立法會後鮮有喺鏡頭前露面，佢話唔做議員唔使再坐定定喺立法會開會，唔單止多咗唔少私人時間，可以去旅行同做運動外，成個人更輕鬆得多，連早年碌落樓梯所造成嘅後遺症都幾乎冇埋，話簡直可以用逍遙自在呢個詞語嚟形容現時嘅退休生活。
憂潘少唔夠時間抖
英姐話自從離開立法會後，佢已經如願去咗一直好想去嘅台灣綠島旅行，又同老公頻頻參加內地旅行團歎世界。英姐三年幾前喺中環舊立法會大樓不慎碌落樓梯受傷，要即時做手術將盆骨移正同取出碎骨，佢話現時天氣稍涼唔適合游水，但佢堅持隔幾日就喺屋企樓下嘅公園行番兩個圈，算係叫做保持住做運動嘅習慣。佢話現時投放得最多時間嘅就係去勞聯做義工，幫手主持勞工權益講座。
立法會頻頻拉布，英姐感慨現時議會文化少咗包容，多咗嘈吵，同以前相比有好大分別。除此之外，英姐仲為佢嘅接班人潘兆平（潘少）擔心，事關依家做議員好多時間要開會，根本就唔夠時間休息。不過，佢話唔敢喺潘少面前講呢番說話，費事畀對方話佢幸災樂禍喎。