政情：王國強推「五天工作」
貨櫃碼頭工潮嚇怕唔少大老闆。建築企業金城營造老闆兼廣東社團總會主席王國強（K.K）都大嘆老闆難做，佢話單係請燒焊工人，出到日薪千八元都無人問津。為吸引後生仔入行，K.K除出動銀彈政策，稍後將首推五天工作，真箇用心良苦。
寄語後生仔肯搏定出頭
多個行業有工無人做，建造業人手更是奇缺，令K.K好頭痛。除咗燒焊工，其他工種都一樣咁難請，例如雜工亦已出到日薪八百元，仍然請唔到人。佢慨嘆建築呢行人手漸老化，平均年齡至少四、五十歲，後生仔大多嫌辛苦，唔願入行，遲早出現青黃不接。為吸引新丁加盟，K.K諗盡辦法，甜頭盡出，除咗使出銀彈，仲會打破建造業「六天工作」傳統，畀員工享受「五天工作」，周末陪吓屋企人。
佢又刻意提拔上進嘅年輕同事，好似佢公司一位「科文」，會考成績本來科科紅，後來發憤喺公開大學進修大學學位，依家再讀埋博士學位。咁好學，K.K拿拿臨升佢做中層管理人員，所以行行出狀元，寄語後生仔唔好怕蝕底，只要肯搏肯做，一定有出頭天喎。