政情：建制派望君剪布
四位議員單憑一場拉布戰，就可以玩轉整個立法會，搞到建制派議員日日開會都提心吊膽，出去食飯又驚唔夠人而流會，留喺立法會又怕自己聽唔到數法定人數嘅響鐘聲，唔少建制派議員都疑似患上「響鐘恐懼症」或者幻聽。聽聞班建制派已經頂唔順主席曾鈺成仲唔剪布，反而轉向內會主席梁君彥（Andrew）埋手，希望Andrew捱義氣做一次「金刀梁」剪布，引剪成一快。
屬政治責任 梁君彥唔肯
梁君彥係內會主席，按照議事規則，如果開會期間曾鈺成要食飯、去廁所等行開行埋，就會由Andrew坐上主席個位，代曾鈺成主持會議。曾鈺成對於剪唔剪布考慮得十分嚴謹，所以少數唔耐煩嘅建制派議員就諗住打Andrew主意。有人勸Andrew頂檔期間，不如靜雞雞大剪一揮，咁人人都一定會暢快到極，唔使日日食飯都好似碼頭工人咁辛苦，食得嗰十五分鐘，一出一入立法會都要報到以湊夠人數，變晒小學生咁無自由。
建制派諗剪布諗到頭都大，睇怕呢招都係無橋之中嘅橋，雖然代理主席嘅權力基本上同主席無分別，不過精甩尾嘅Andrew當然唔肯剪，聽聞佢認為剪布係政治決定，自己只係代主席，無必要由佢去背負呢個政治責任，所以最多裁決議員有無違規，例如議員多次重複發言，就會要求佢中止發言，無諗過要代曾鈺成剪布。
傳特首答問會剪布良機
建制派發夢都諗緊剪布，近日亦有傳後日嘅行政長官答問大會係剪布嘅黃金時機，因為拉布四子喺答問大會一定搞事，好快就會畀曾鈺成驅逐，唔准佢哋當日返回議事廳，於是就搭構咗剪布良機。但我哋問過立法會秘書處，發現呢條橋亦係行唔通，原來答問大會同拉布大會雖然係同一日，但屬於兩個獨立會議，就算拉布四子喺答問大會被趕走，仍然可以施施然返去之後嘅會議，繼續拉布攪局。
剪布呢單嘢實在困擾唔少建制派議員，所以今晚建制派同特首梁振英嘅飯局，分分鐘變成拉布訴苦大會，但同梁振英講都無用啦，剪布權都唔喺佢手上。