中環出更：自家品牌 沈運龍夫婦創意多
做珠寶生意嘅中華廠商聯合會常董沈運龍（Aaron）百足咁多爪，由鑽飾、腕錶到葡萄酒都有自家品牌，認真點子多多，原來背後有位設計高手全力支持，佢就係沈太鄭玉玲（Alice）喇！Alice自細喺巴黎長大，對品味嘅要求同呼吸一樣咁理所當然，難怪同創意無限嘅Aaron咁合拍。
妻負責產品開發
Alice係越南出世嘅福建人，幾個月大就跟隨父母移民法國，畢業後即入咗珠寶行工作，有次喺珠寶展上與Aaron相識，移居香港至今逾十年。現時Alice負責產品開發，自家牌子已有七、八個咁多。佢笑稱，有時自己想要乜嘢款式嘅首飾，就自己動手設計，開心過出去買。
早前Aaron喺紅磡總部舉行靚鑽醇酒私人聚會，用友情價開倉益老友，廠商會會董蔡少森都趁機去買鑽石頸鏈，仲話經常嚟幫襯。問佢係咪逢親重要節日就嚟買件氹老婆開心？佢笑笑口教路，送禮物最好唔好揀節日，幾時想送就送，咁就可以不停製造驚喜，最緊要消除預期心理，呢招叫做「期望管理」喎！