中環出更：冒雨補鞋胡紅玉慳錢
剛剛獲政府委任競爭事務委員會主席嘅行政會議成員胡紅玉（Anna）原來好識得知慳識儉，卓妮早幾日見佢現身中環戲院里其中一個懷舊排檔，原來係攞對鞋去補，既慳錢又環保。
上周五下晝兩點半，黑衫黑褲但左肩搭住條灰色頸巾嘅Anna一個人現身中環雪廠街，佢右手拎住手袋及一間連鎖餅店嘅紙袋。當日落住毛毛細雨，佢冇帶遮喺身，顯得有啲狼狽，惟有盡量行去有瓦遮頭嘅樓底。接住Anna好熟路咁轉入戲院里，停喺一間補鞋嘅排檔前，放低手袋喺舖頭枱面，掏出一對用透明膠袋盛載嘅黑鞋，睇嚟係想補番對鞋。
逛時裝店齋睇唔買
Anna放低咗對鞋之後，同排檔老闆娘交代咗幾句，佢繼續喺中環大街小巷穿梭，移步到皇后大道中萬邦行。萬邦行嘅商場一樣係好懷舊，佢搭扶手電梯上一樓，然後步進一間面積細小嘅女裝店睇衫。卓妮見店員殷勤咁招待Anna，佢亦好有耐性咁逐件睇、慢慢揀，逗留咗十五分鐘，不過最後都係冇買到就離開。
卓妮上前同Anna打招呼，佢話最近忙於為競委會廣納賢能，要搵夠五十個委員，並非一件易事。至於佢手上嗰袋餅，佢話當晚有朋友請佢食飯，所以買嚟送畀朋友當回禮。Anna公務咁忙都咁有朋友心，認真難得。
卓妮