中環出更：巴黎人好客 楊章桂芝驚喜
近水樓台，新華旅遊董事總經理楊章桂芝（Cindy）遊歷遍全球，佢趁早前復活節假期又再出動，今次玩轉巴黎、倫敦及比利時，狂掃法國名牌手袋。不過，此行最大收穫，並非滿載而歸，而係發現以往較為高傲嘅巴黎人，忽然變得好熱情。
遊法狂掃名牌手袋鑽飾
Cindy今次同行仲有大女Sheena及二女Jane，Sheena喺墨爾本開公關公司做老闆，今次專程飛歐洲陪媽媽，認真孝順。撞啱歐元平，Cindy一於買番夠本，抵埗後直奔各大名店掃貨，港人至愛嘅法國名牌手袋，計落平過香港三成，佢索性一口氣掃咗三個，仲買多五條頸巾襯衫添！
掃咁多都仲未夠喉，Cindy轉頭仲睇中一個著名意國品牌嘅鑽石耳環同戒指，一於帶埋返香港，盛惠二十萬港元，佢話香港有錢都買唔到，好抵喎。除咗Shopping外，唔少得品嘗米芝蓮星級餐廳，佢去到巴黎嘅餐廳，侍應殷勤體貼，態度同幾年前相比，簡直係一百八十度轉變。細問之下，原來因為歐洲經濟不景，生意難做，難怪老闆同侍應嘅服務都好啲喇！
卓妮