有時真係好難怪中港矛盾愈來愈尖銳，畢竟本地人見到內地客嘅所作所為的確相當惡頂，好似隨地吐痰呀，又好似車廂便便呀，再加上各式各樣嘅無理取鬧，往往都令到街坊街里對於「強國人」另眼相看。
呢呢呢，最近又發生一宗旅行團不愉快事件，成件事唔知好嬲定好笑，結果又惹起中港矛盾。
話說五一黃金周期間有一個「港澳五天團」，七十名團友來自遼寧、湖北、河南以及西安等省市，其中十一名團友不滿旅遊巴遲到一粒鐘又過於擠迫，於是玩杯葛拒絕上車。當中表現得最激烈嘅係一個來自遼寧嘅四口之家，表達不滿嘅方法包括致電旅遊發展局、致電旅遊業議會、致電香港警務處以及聯絡各大傳媒。全人類都驚動過之後，一家之主嘅鄭先生當眾流下男兒淚，哭哭啼啼以普通話訴苦：「心裏非常不舒服，香港是講法治的社會，完全是欺詐，要求我們守時，不守時大聲去罵，他們自己一點都不守時，這是誠實行為嗎？」
好嘞，哭完啼完訴苦完，苦主到底想點呢？原來係咁，聲討旅行社嘅目的係要求賠償每人三千元，另加三晚免費酒店住宿，簡直係飛擒大咬。
故事講到呢度，大家係咪覺得有人借頭借路發爛渣，然後開天索價抌心口呢？難怪旅行社形容呢件事係「勒索」，不過為咗息事寧人，據講旅行社最終都作出部分賠償，花錢消災。
你知啦，慣於仗義執言嘅本地網民得理不饒人，左一句無恥，右一句無賴，誓要將「黃金客企圖掘黃金」鬧個狗血淋頭。網民普遍認為姓鄭嘅眼淚男係「職業遊客」，一把鼻涕一把淚無非做戲咁做，發爛渣嘅動機係屈錢。更加有網民力撐旅行社，覺得應該報警處理，唔能夠助長旅霸歪風，佢哋話呀：「對於蝗蟲只能一步都不退，一毛都不賠。」
計功夫茶話齋，好客之道當然要善待同胞啦，唔可以任由惡導遊阿珍之流強迫購物，更加唔可以容許旅行社安排團友瞓巴士，之但係好客之道唔應該包括姑息養奸喎。正如香港旅遊業界人士所講，旅霸事件愈來愈多，部分遊客提出嘅賠償好過分，一旦賠償了事，難免其他人有樣學樣。旅議會總幹事董耀中都話，唔贊成旅行社賠錢了事。
即係咁，你低聲下氣賠錢畀旅霸，等於壯大佢哋個賊膽，今次要求賠三千，下次要求賠三萬，永無寧日呀老友！
既然旅霸不能姑息，賠錢等於養奸，不如咁啦，下次再有類似事件發生，交由執法部門依法處理囉，斷估香港公安唔會偏袒任何一方啩。