各國菜式都有本身嘅獨有特色，好似京菜就會食北京填鴨，英式就梗係食炸魚同薯條啦！不過，最近聽聞有位尊貴嘅議員，竟然要求喺一間法國餐廳叫鹹魚，咪搞錯，佢唔係叫法國嘅小鯷魚，而係中式嘅鹹魚。話說早前有位尊貴議員喺中環四季酒店間米芝蓮星級法國餐廳宴請好友，當大家歎完主菜之後，開始品嘗靚酒同芝士，點知席間一位有分量嘅貴賓突然話唔想食芝士，尊貴議員就即時諗諗計，睇吓有乜食物可以代替芝士。
尊貴議員就靈機一觸話，既然西方芝士唔啱，就食一樣可媲美芝士嘅中國食品啦，就係鹹魚喇，隨即向侍應落單要咗一碟。法國餐廳都有中式鹹魚？不過，最後餐廳真係提供到畀呢位尊貴議員，等佢唔使失禮於賓客前，亦引證呢位議員嘅身份顯赫。事後有人耳語，點解呢間法國餐廳會有中式鹹魚呢？有人估計，會否係餐廳員工平時自己用膳嘅存貨呢？抑或係即時派人去海味店買條鹹魚返嚟呢？