政情：公民講場：流會屈同袍長毛賊喊捉賊
社民連梁國雄（長毛）同人民力量陳偉業尋日重施故技，喺立法會審議財政預算案撥款開會時要求主席點算人數，然後離開會議廳，因為開會人數不足，成功搞到流會，又少咗兩日開會時間。不過，長毛竟然喺會後惡人先告狀，將責任全部歸咎於冇出席會議嘅建制派議員身上，又話「善惡到頭終有報」，但其實有好多泛民主派議員都未有及時出席會議，咁講真係賊喊捉賊。有建制派議員更直斥長毛嘅言論係「強盜邏輯」，又批評佢經常要求響鐘點人數係浪費公帑。如果最後未能及時通過預算案，相信受影響嘅市民會識得追究邊個責任喇！
