尋日立法會流會令拉布戰暫停，回顧多日拉布未見咩火花，但原來背後一早火花四濺。話說早幾日喺立法會宴會廳，社民連梁國雄（長毛）同飲食界張宇人（Tommy）就爭啲開片大打出手，有旁觀者話兩人當時動咗真火，面貼面咁駁火，濃濃火藥味籠罩成個宴會廳，搞到席間唔少議員都放低筷子唔食飯，索性食花生睇戲。
點解兩人嘈交？事緣當日長毛不滿主席曾鈺成裁決佢發言重複，卒之等到午飯時間，長毛即刻衝入宴會廳搵食緊飯嘅曾鈺成理論，點知坐喺隔籬嘅Tommy，忍唔住長毛疲勞轟炸，突然企起身反擊，叫長毛唔好阻住人食飯，有咩事都等食完先再講，長毛當然唔理佢啦，所以就嘈起上嚟。有旁觀者話長毛已經唔細聲，點知Tommy仲大聲，仲好霸氣咁爆咗句「我廚房佬有咩未見過！」搞到長毛都打咗個突，唔識回應。
唔知係咪議事規則唔適用於宴會廳，所以曾鈺成任由兩人駁火，反而衞生服務界李國麟就做和事老隔開兩人。長毛事後承認有同Tommy輕微身體接觸，而Tommy就話覺得食飯係件好神聖嘅事，好憎畀人騷擾，所以先同長毛理論。但佢話大家嘈完就算，第日佢話自己條腰痛，長毛都有介紹中醫畀佢睇喎。