政情：「家是香港」料花五百萬
一班司局長上星期一連三日落區搞清潔騷，為「家是香港」活動揭開序幕。活動搞到咁大型，究竟要使幾多錢呢？政府只係話活動不涉額外開支，又話政府新聞處每年都要搞吓大型活動，強調活動經費來自決策局及部門嘅現有資源，但就點都講唔出具體要用幾多錢。不過，原來有關活動開支預算，早已隱藏喺本年度財政預算案嘅新聞處開支預算內，估計活動要用五百多萬元。
開支早列預算案內
我哋翻查本年度預算案，政府新聞處喺今年內將會舉辦八次大型活動同百場小型活動推廣公民責任，共開支四千六百萬元，原來八次大型活動中，其中一項就係「家是香港」，除開即係要花五百多萬元開支。睇番之前幾場清潔騷，雖然各高官落力示範，傾情演出搞到連掃帚都要壯烈犧牲，可惜市民對活動似乎冇咩感覺，更遑論感到當中嘅正能量，唔知納稅人又覺得使呢幾百萬值唔值呢？
近日我哋發現，市面出現咗一片「家是香港」嘅旗海，最誇張嘅係政府總部內對正餐廳門口嘅一幅巨型橫額，無他嘅，咪係無時無刻提醒各位公務員，大家嘅「家」就係香港囉。