政情：謝偉俊鐵頭仁論壇互窒
尋日城市大學舉行咗個「佔領中環」論壇，發起「佔中」行動嘅香港大學法律學院副教授戴耀廷，立法會議員何俊仁、謝偉俊以及相關人士都有出席。「佔中」行動之前籌到嘅資金，轉個頭已經嚴重匱乏，終於要搵大水喉射住。戴耀廷就大爆，已經積極同民陣傾緊，希望對方喺七一幫手籌錢喎。
尋日個論壇本來好和平，不過到兩位議員發言時，唔知係咪拉布拉得唔耐煩，怨氣特別重，忍唔住互窒對方，一度唇槍舌劍。謝偉俊話，「佔中」未開始，已經引起咁多市民不安，似乎想搞到個社會愈亂愈好，香港睇落好似乜都好先進，唯獨政治方面好幼稚。
支持「佔中」嘅何俊仁聞言就明寸對方，「謝偉俊平時着衫去玩都好前衞，但係政治發言就比較幼稚喇！」謝偉俊亦不甘示弱，反寸對方：「呢啲咪就係大佬文化囉！何謂大佬文化？即係話，我喺政圈咁多年，你哋啲o靚仔識咩吖！」何俊仁一於當耳邊風，趁謝偉俊發言嘅時候，拎住本《基本法》小冊子喺度睇。
不過，最後二人喺總結時都打圓場，台上嘅怨氣，係唔需要帶落台嘅。