政情：蔡菜子除根保票倉

北角係傳統福建幫地盤，蔡菜子向來唔建議將北角劃分到支離破碎，但東區區議會又的確係比其他區議會龐大，有需要重新劃區平衡。所以最近有東區區議會就流傳一種聲音，話蔡菜子想保住北角區，就算重新劃區都要北角齊齊整整，寧願將北角區同灣仔區合併，都唔想搞散呢個福建幫票倉。我哋尋日搵過蔡菜子，但佢未有回覆。

福建幫若進駐 灣仔恐「洗牌」

有地區人士評估過，呢個劃法係咪有利民記就唔知，但肯定有利蔡菜子，因為成個北角區共有十一個選區，近乎全部都係福建幫嘅勢力，反觀灣仔區議會人丁單薄得十三人，如果北角區劃入灣仔，咁呢十一名福建幫就成為灣仔區第一大勢力。唔止人數上佔優，權力上都可能重新洗牌。因為現任灣仔區議會主席孫啟昌係委任議員，除非佢轉戰直選，否則灣仔區要另覓話事人實在大條道理，當中又以蔡菜子同維園區議員周潔冰做主席呼聲最高。

既然將北角區劃入灣仔區對蔡菜子有利，咁對咩人不利呢？就係佢黨友鍾樹根喇！去年成功上位嘅樹根，一向靠東區票源食胡，而東區又以兩大票倉作支援，第一係北角福建幫，第二係柴灣區民記區議員支持者。如果北角區歸入灣仔，啲選票會否一去不復返呢？樹根同曾鈺成喺下屆立法會選舉仲可唔可以再度施展「黃金配票」魔法呢？不過，未到最後拍板都仲有數拗嘅。