中環出更:肥亨賣樓唔見兩千金

前商務及經濟發展局局長馬時亨(肥亨)本身係財經界出身,掌握投資之道梗係唔在講。佢上年就以九千萬元高位,放售港島中半山馬己仙峽道澄碧閣一個低層單位。雖然話肥亨豬籠入水,但同時佢都唔見咗兩「千金」喎,點解?咪係因為佢嘅兩名乖女先後嫁人囉!卓妮前日仲見到肥亨現身一間髮廊,唔知係咪剪番個靚髮去辦喜事呢?

卓妮前日勞動節假期行經銅鑼灣世貿中心,咁啱遇到着住恤衫西褲加橙色風褸嘅肥亨,一支公走入九樓一間髮廊。店內職員一見肥亨光臨,立即一擁而上殷勤招呼,仲帶佢行入貴賓房,一睇就知係熟客。佢同職員溝通咗幾句,髮型師就開始幫佢洗頭同剪頭髮。大約一個鐘後,剪短咗頭髮嘅肥亨成個型仔晒,精神奕奕咁行返出嚟,仲笑騎騎同卓妮打招呼,心情靚到爆。

變二人世界住細啲

肥亨大女馬露明去年已經嫁人,佢承認細女馬露玲亦將於今年出閣,好事浪接浪,真係恭喜晒!聽聞佢上年賣樓後,一直同太太王培琪喺舊居附近租樓住,直至最近先至做番業主。肥亨話,一家四口霎眼變番二人世界,兩公婆住細啲都冇問題。至於佢最近買入嘅港島南大潭道浪琴園一個二千幾呎單位,只係用嚟放租,就算未來有乜依郁,叫做點都有瓦遮頭,果然精打細算。

講番間髮廊,肥亨話自己成日都去剪髮。據知情人士透露,唔少名人都鍾意去幫襯,就連特首梁振英都係座上客,仲話上周先至幫襯過喎!

卓妮

第一手消息請下載on.cc東方互動iPhone/iPad/Android/Windows Phone Apps