「幼稚，你真的很幼稚耶！」睇過《那些年》嘅朋友應該記得戲中女主角係點樣責備男主角嘅。講真吖，現實世界確係有好多非常幼稚嘅人，包括理論上學富五車嘅教育界官僚，佢哋最幼稚嘅表現正正出於管理幼稚園，害到學生家長叫苦連天，相信為人父母者都好想對住教育局局長吳克儉責備一句：「幼稚，你真的很幼稚耶！」
吳克儉，外號唔得掂，佢老哥最唔得掂嘅係承繼咗前特首曾蔭權一筆蘇州屎遺產，叫做幼稚園學券資助計劃，向學生家長提供學費資助。本來呢一個減輕財政負擔嘅計劃算得上係好過冇嘅補鑊方法，畢竟硬件先進而軟件落後嘅香港，遲遲都未似得澳門一樣推出十五年免費教育，入讀幼稚園隨時貴過讀大學，有學券幫補幫補聊勝於無。問題係本地官場最鍾意好心做壞事，學券資助計劃出現咗一個極之巨大嘅漏洞。
乜嘢漏洞咁大呢？教育局冇錯為幼稚園學費設立上限，園方收取嘅學費總額唔准超過成本價百分之十五，不過弊在雜費不設限。審計署調查過一百二十一間幼稚園發現，冇披露嘅雜費項目佔整體雜費收入嘅六成，個別幼稚園嘅雜費收入相當於學費收入嘅四成四，數額動不動以千萬元計，部分學校將雜費撥歸「其他營運收入」，避過利潤規管上限。即係話，你唔准幼稚園收得太多學費吖嘛，園方就巧立名目濫收雜費，學前教育變成蠱惑收費嘅牟利生意。
「東方報業民意調查」顯示，三成七受訪者批評教育局監管不足；兩成八認為濫收雜費情況嚴重；兩成六斥責幼稚園無王管，家長任人宰割。調查又顯示，三成六受訪者覺得學券制只管學費不管雜費係存在漏洞；三成二批評學券制冇發揮作用；兩成四直指效果弄巧反拙。
除咗濫收雜費之外，仲有一個問題係咁嘅，有部分幼稚園租用自己辦學團體嘅物業作為校舍，居然得到教育局發還租金津貼喎。對於呢一個古怪現象，三成五受訪者認為當局必須檢討制度堵塞漏洞；三成二指摘監察不力令公帑流向不明；兩成一形容學券制資助淪為提款機。
你知啦，貪曾遺禍，非同小可，現屆政府少啲精力都會倒瀉籮蟹。偏偏吳克儉局長一上台就由於推行國民教育而撞大板，撞到焦頭爛額嗰隻，堵塞幼稚園漏洞就顯得無能為力嘞。
計功夫茶話齋，發憤圖強呀局長大人，唔好瞓覺呀政壇新貴，管理幼稚園係唔可以咁幼稚o架，學券制漏洞固然要補鑊，更加重要嘅係盡快落實十五年免費教育，唔好任由學界奸商魚肉百姓吖嘛！