更新換代係每個政黨嘅指定動作，雖然距離一五、一六年兩場選舉仲有數年，不過據聞民建聯開始作出部署，並率先鎖定東區區議會須大換血，因為東區樁腳已老化到非換不可。
民建聯喺東區區議會係大戶，扎根東區多時嘅鍾樹根受惠於東區堅實嘅地區樁腳支持，喺去年立法會香港島選舉殺出血路，一圓「立法會議員夢」，鍾樹根贏咗議席後，民建聯未有貪勝不知輸，分析港區四大區會選區強弱後，發現東區樁腳急速老化嘅問題最為明顯。
有資深地區人士分析，倘多名現屆區議員一五年角逐連任，至少有四人會年屆六十五歲或以上，其中區議員許嘉灝再度披甲上陣時更會以六十八之齡出戰，問題有必要正視，免得畀對手以年輕力壯嘅候選人逐個擊破。
相對東區，民建聯喺中西區換血工作基本完成，依家基本上主力係「七十後」嘅中西區區議員張國鈞等人，另「八十後」嘅區議員蕭嘉怡亦冒出頭來，年紀最大要數到現年六十一歲嘅區議會界別代表葉國謙，睇怕東區要好似中西區以「七十後」為主力，真係要加把勁。