政情：前車可鑑 黃國健仙人掌送官

最多值廿蚊

工聯會立法會議員黃國健（KK）尋日喺秀茂坪開設議員辦事處，邀得食物及衞生局局長高永文等人做主禮嘉賓，喺贈送紀念品環節，KK送咗仙人掌畀各主禮嘉賓（圖），一定係貪仙人掌生命力夠強喇。KK話，最近呢兩年佢哋送畀嘉賓嘅紀念品主要係植物，好似今次嘅仙人掌只係最多廿元。

同日民建聯陳克勤聯同大埔區議員黃容根喺太和開聯合辦事處，出席主禮嘅運輸及房屋局局長張炳良既無戴襟花，主人家贈送嘅蘭花亦只係用作合照之用，據聞張炳良事後都無拎走，睇怕各高官見到湯顯明因酬酢安排一身蟻，加上特首又三令五申參加活動時唔接受紀念品，出席活動時都提高警覺。