政情：鬍鬚曾派防疫包冇人吼
政府官員一連三日落區宣傳全城清潔日，尋日就輪到財政司司長曾俊華同律政司司長袁國強等官員。吸取前兩日嘅教訓，財爺尋日朝早去銅鑼灣洗地時冇再整爛掃把，但就喺派防疫包時處處碰壁。話說鬍鬚曾雖然懶醒咁選擇喺平時人來人往嘅鵝頸橋底派防疫包，但佢似乎唔記得咗尋日係星期日，冇乜人會好似佢咁六點鐘就起身，所以佢喺朝早近九點行咗成幾分鐘，都沒有市民肯接佢手上嘅防疫包。
鬍鬚曾派完防疫包後就喺網誌撰文，話呢個星期的天氣仍然是煙雨淒迷，令人納悶，相信不少立法會議員、秘書處和政府的同事也會有同感。佢講緊嘅，當然係預算案嘅拉布啦，佢就話四個立法會議員拉布，等如「綁架」預算案。
網誌撰文批拉布「三無」
佢批評預算案拉布行為猶如「七傷拳」傷人傷己，又話其實呢個係三無嘅行為，即係無社會共識、得唔到人支持、對社會亦冇任何得益，呼籲議員適可而止，唔好繼續綁架預算案嘥晒立法會時間。佢又向各黨派議員致敬，話佢哋堅持出席呢啲不必要嘅冗長會議，令審議預算案工作沒有中斷。預算案拉布繼續，過咗周末，拉布今日九點鐘開始。