政情：瘀民主阿婆露底
「民主阿婆」、前政務司司長陳方安生近日借政改前期討論「過橋」，一時又話以關注商界聲音為賣點，講到自己好似為咗民主大業拋個身出嚟，查實民主阿婆呢個「舊電池」每次出動都別有所圖，終於露底，佢尋日終於講到出口希望有機會同中央溝通，講到尾其實想為自己裝番個消失咗嘅政治光環。
成立組織搞搞震 廣受批評
民主阿婆上周中成立「香港2020」政改平台，整色整水包裝佢哋係關注商界聲音，前港區人大代表吳康民率先撰文批民主阿婆係港英餘孽第一梯隊，只可惜「氣數已盡」。之後佢又畀自由黨榮譽主席田北俊以商界身份反批民主阿婆捉唔到商界關注點，叫佢唔好扮商界代表。民主阿婆早幾日出席論壇時更畀台下人士挑機，翻舊帳話佢講到民主咁好，點解做政府官員時唔推動民主喎。
民主阿婆連日上竄下跳無所不用其極，原本以為佢又想過吓鎂光燈癮，不過民主阿婆尋日喺電視台訪問時終於露底，原來佢係想有機會同中央溝通。當主持人問到如果有朝一日好似之前政改方案，邀請佢入中聯辦去傾係咪接受時，民主阿婆起初顧左右而言他，之後被再三追問係咪唔使理中聯辦時，佢終於明確講到明同中聯辦溝通係正常嘅事，不過談判對象一定係特區政府。
劉迺強：冇咗電嘅舊電池
民主阿婆連日講東講西終露出狐狸尾巴，親中陣營乘機潤佢畀說話佢聽，其中以基本法委員會委員劉迺強最為理直氣壯，直指唔需要高估民主阿婆呢個平台，事關佢唔只係舊電池，直情係無咗電，又話民主阿婆聲稱代表商界發聲係無意思，其實至今都無商界承認係代表佢哋嘅意見，不過劉迺強最為「夭心夭肺」嘅一句，就係直斥民主阿婆呢個人係過去式，所以認同吳康民形容呢個人「氣數已盡」嘅說法。
不甘寂寞嘅民主阿婆畀人睇穿晒佢嘅底牌，又畀人寸到應一應，睇怕之後想扮乜代表都再無人信，有多餘時間剩嘅不如疊埋心水恤多啲髮扮靚，總好過出嚟指點江山後畀人冷待咁自討沒趣喇！