中環出更：唐唐梁粉馬場緣慳一面
去年喺特首選舉中落敗嘅全國政協常委唐英年其實係愛馬之人，仲曾經係馬會大董，只係近年佢做官，至幾乎絕迹馬場。尋日沙田馬場舉行大型盃賽，佢兩夫婦就同唐媽媽尤淑圻齊現身，仲帶埋一班朋友入場碰運氣。一向熱愛賽馬運動嘅唐唐笑容滿面話，今次入場，係嚟請朋友食飯。不過世事就係咁蹺，一群「梁粉」尋日亦喺馬場出現，不過同唐唐並無碰面。
雙方相隔幾十米廂房
唐唐咁耐無去馬場，入到場當然成個人生晒，佢仲同朋友喺廂房外嘅露台睇馬，睇到指手畫腳，不知幾興奮。尋日馬場內嘅「梁粉」，包括三位行政會議成員張震遠、張志剛同周松崗，佢哋都算係馬場嘅稀客，竟然同唐唐喺馬場相隔幾十米嘅廂房，一齊睇馬。較少露面嘅張震遠太太都有入場，卓妮問佢張震遠又連任市區重建局主席，會唔會太忙冷落家庭，張太就話老公埋首工作已經慣晒，就當畀多啲私人空間自己喎，認真體貼。
另外仲有位馬場「稀客」低調現身，佢係獲得十二億元贍養費嘅恒豐企業主要股東李德義前新抱曾昭穎。當時佢戴上黑色禮帽半掩面龐，同一男一女友人齊齊觀賽。卓妮上前同曾昭穎打招呼，聲稱係第一次入馬場嘅佢話，自己有小注怡情，其中一場仲贏咗添，不過之後眼光就差咗少少，最終打番個和。問到近況，佢即微笑回應：「好好，唔該晒。」
卓妮