新政府初上台，市民都有所期待，以為新人事新作風，會有些新現象；老朽亦以為「美景良辰，喜見天時初轉泰；光風霽月，幸逢人事又重新」。可是，十個月過去，讓人看到的是，新政府的施政能力遠不如競選能力，其施政特色，依然係講多過做。
最近，又見當局有新搞作，就係大鑼大鼓推出「家是香港」運動，連串活動一味吹水粉飾和諧太平，如果咁就可以為香港帶來活力，令港人感到「自豪」同埋帶來「正能量」，咁市民就唔使咁鬼閉翳！
新政府上台以來，社會未曾安靜過，不是反呢樣反嗰樣，就係工潮風起雲湧，社會紛紛擾擾，政治爭拗不斷，拉布剪布玩得不亦樂乎，整個城市充斥噪音！
高官遇事就龜縮，不在其位愛亂噴口水嘅翻閹廢官如周一鑊，卻勇於亂噏一通，樣樣都指指點點，更攞命嘅係以五音不全嘅歌喉製造「忘不了你」，也難怪香港呢個憤怒之城，相遇的不是人，而是各式各樣的噪音！老朽以為辭去教職，可以安心寫字編稿，即使未能「細數落花因坐久，緩尋芳草得歸遲」，擺脫課室內的嘩鬼，誰知碰上一隻躁爆嘅黑鑊，唉！世事豈能盡如人意！
講真，「家是香港」確令人丈二金剛摸不着頭腦，大多數香港市民，又唔係高官，難道可以家在英倫？難道可以如內地啲貪官裸官，可以家在美國、加拿大、澳洲？
詩人講得好：「無論海角與天涯，大抵心安即是家」，「身心安處為吾土，豈限長安與洛陽」；如今香港就係日日躁爆，社會矛盾千頭萬緒，政府施政錯漏百出，新政推出一項跪低一項，市民想「心安」，睇怕要移民上火星矣！
要言之，政府愈是多多動作聲情，如江湖郎中推銷「家在香港」，當高官的卻未能做出榜樣，釋出的只會是負能量！