政情：高官街市清潔騷唔齊心
由政務司司長林鄭月娥牽頭嘅「家是香港」運動尋日揭幕，頭炮嘅「全城清潔運動」由林鄭帶領一眾司局級高官去清潔大埔街市，包括食物及衞生局局長高永文、行政會議成員兼大埔區議會主席張學明，仲有同林鄭勁似樣嘅民政事務總署署長陳甘美華添。可惜出師不利，一早就落大雨，令活動開幕典禮被迫由戶外移師入大埔街市內擠迫舉行。
班高官尋日分頭落區搞清潔騷，如運輸及房屋局局長張炳良去上水洗地、教育局局長吳克儉就去西貢掃地等，相反林鄭同高永文就只係喺大埔街市抹吓欄杆，但佢哋都認真落力抹，帶晒黑色膠手套成個清潔工人咁款。不過，企喺林鄭隔籬嘅張學明就抹得「好Hea」，抹咗幾吓就停晒手，淨係識笑；而陳甘美華仲企埋一邊，又係做樣抹一抹。
檔販歡迎 街坊嫌阻住
抹完欄杆，林鄭等一眾官員就巡視街市肉檔、雞檔，提醒檔戶注意清潔衞生，又大派口罩、洗手液。有雞檔檔主仲順勢話H7N9恐慌下生意難做，問佢可唔可以減租。雖然林鄭受檔販歡迎，但其他買餸街坊就嫌佢搞到阻住晒通道。其實林鄭與其走去清潔街市，不如快啲去清潔下廉政公署先啦！