政情：建制派生銹剪 愈幫愈忙
立法會審議財政預算案「拉布戰」已經玩咗幾日，每當聽到點算人數嘅鐘聲響起，班議員就會好似喪屍咁喺樓上辦公室拖住腳步落去會議廳開會。雖然今次建制派同泛民主派首次攜手合作抗拉布防流會，但睇番佢哋呢幾日嘅開會表現，似乎係一盤散沙，冇組織可言，而且部分建制派行為舉止眼高手低兼冇水平，更當場慘被主席訓斥，十足生晒銹嘅鉸剪，幫手剪布不成反而將塊布愈拉愈長。
為咗唔想背負拖垮政府運作嘅政治責任，大家都致力同社民連及人民力量四位拉布議員劃清界線，又由得四子自說自話。原本呢個方法都幾有效，但總係有啲議員抵唔住頸開聲發表偉論或質疑拉布嘅議員離題，變相幫手燃燒時間。好似向來聲大嘅蔣麗芸（Ann）就質疑人力黃毓民發言內容違反規程，但主席曾鈺成就裁定毓民嘅發言同主題有關，反叫阿Ann畀啲耐心聆聽其他議員發言。
工聯會黃國健（KK）就喺人力陳偉業（大舊）批評該會榮譽會長鄭耀棠冇幫碼頭工人發聲時，彈起身批評大舊講嘢缺乏事實根據，結果被主席曾鈺成教斥，話佢唔係第一次參與會議，應該知道議員講嘢並唔係句句都要有事實根據嘅，又話如果佢想挑戰其他議員嘅言論，應該循正當途徑發言。佢同阿Ann幫手剪布不成，反而仲要主席浪費時間去訓斥佢哋，真係愈幫愈忙。
騸雞做「逃兵」 下月赴美
主席裁定拉布議員發言冇離題，傳聞中嘅「剪布」又未確定日期，其他議員惟有繼續留喺會議廳挑戰體力同聽覺嘅極限。不過，並唔係所有議員都願意被困，白鴿黨單仲偕（騸雞）尋日就宣布下月會做「逃兵」，飛去美國出席兩個囝囝嘅畢業禮，兩個畢業禮之間又會應美國領事館邀請去首都華盛頓考察國會運作兼會見國會議員，聲言如果立法會因為佢一個搞到流會都冇辦法喎。
至於將會喺下月底嫁女嘅新民黨田北辰（田二少）就希望拉布唔好拉到咁耐，如果到時立法會真係仲拉緊布，相信田二少一定會揀去囡囡婚禮。但就算拉布四子發言捱得到下月底，傳聞主席都唔會畀佢哋玩咁耐，必定會履行立法會嘅憲制責任，手起鉸剪落，狠狠剪布。