中環出更：廖偉麟叫老友投資忍手
內地H7N9疫情肆虐，南北韓關係又緊張，唔少投資者都對環球經濟持觀望態度。善於投資商廈嘅廖創興家族後人、紀惠集團副主席廖偉麟（Jeffrey）日前同班老友食飯時話，短期內經濟前景唔明朗，已經叫班老友忍忍手，暫停一切重大投資，等到年中經濟轉趨明朗化，至再作打算。
拉隊歎潮州菜
Jeffrey同胞姊廖偉芬日前應香港青年聯會賢慧社姊妹張詩培邀請，搵埋城中一班青年才俊，拉隊去西環一間潮州菜館開餐，順道同移居加拿大、最近返港探親嘅青聯副主席彭芷君（Gigi）敍舊。同行仲有馬會董事葉澍堃細仔葉瀚華（Ian）、莎莎國際老闆郭少明千金郭詩慧及丈夫陳振邦等老友，湊埋成圍枱好熱鬧。Jeffrey笑言，難得近日比較清閒，趁住日圓大跌，啱啱去咗日本滑雪度假。當晚除咗Jeffrey同大家分享投資心得外，一向識飲識食嘅Ian，更分享品酒技巧，搞到大家頻頻乾杯，飲多兩杯。