老弱傷殘本身已經夠慘啦，如果無依無靠得唔到適當照顧，更加係慘上加慘。點先至叫做適當照顧呢？即係咁，四肢健全嘅正常人都要有瓦遮頭啦，老弱傷殘最低限度有一個蝸居嘅地方，而呢一個地方係方便起居飲食嘅。
問題偏偏係咁，政府資助嘅院舍名額少得可憐，有部分嚴重殘障人士○六年申請入住，要等到今時今日先至得到編配，你話幾咁慘無人道吖！
至於照顧公公婆婆嘅安老院舍，同樣係僧多粥少，排隊輪候排到水蛇春咁長。舊年喎，輪候資助住宿照顧服務期間死亡嘅長者有五千一百幾人，較前年增加一百八十三人，平均輪候時間三十五至三十八個月，申請人平均年齡八十二歲。喂喂喂，一年有五千個公公婆婆等到死都冇得入住安老院舍，證明特區政府嘅社會福利政策係幾咁失敗。
冇耐之前，勞工及福利局局長張建宗書面回應立法會議員質詢，根據局長披露嘅數字顯示，智障人士輪候資助院舍平均時間遠遠超出合理水平，中度弱智人士嘅輪候時間平均竟然長達七年，嚴重影響有需要人士嘅健康同生活質素。
老弱傷殘就算夠長命等到入住政府資助嘅院舍，所得嘅照顧都唔係好周全o架咋。就以沖涼為例吖，話唔定三日先至可以有人幫手洗白白。若然係「居家安老」，情況仲死火，香港防止虐待長者協會社區幹事曾昭偉講過，目前社區提供嘅陪診以及家居清潔等等安老服務已經爆滿，喺觀塘同黃大仙等等地區，長者要輪候九至十二個月先至得到上門送飯服務，上門沖涼服務更加要等四至六日。
簡單咁講，老弱傷殘得到嘅照顧非常不足，張建宗有必要從速改善，否則愧對自己名片上面嘅「福利」兩字。
冇錯，最新一份財政預算案話喎，政府會增加下年度社會福利嘅經常開支至五百六十億元，增幅百分之三十一。為咗鼓勵居家安老，會用三億八千萬元試行社區照顧服務券。至於院舍安老，政府會用七千三百萬元興建三間安老院舍，提供六百個宿位，又會增撥一億六千幾萬元提高七千個護理宿位嘅資助額，又會將七千八百幾個普通宿位提升為持續護理宿位。問題係，安老院舍增加六百個宿位夠唔夠呢？唔好唔記得，舊年有五千個公公婆婆等到死呀，答案好明顯係杯水車薪啦！
有人比較過，其實坐監嘅待遇好過入住老人院，起碼可以日日沖涼先吖，而且食飯娛樂全部免費喎。張建宗呀張建宗，如果唔想疏於照顧繼續愧對老弱傷殘，不如索性將佢哋送入監獄啦，笨！