政情：公民講場：貪湯入鄉隨俗 人到禮到

繼本報獨家踢爆前廉政專員湯顯明在任期間「大花筒」外訪後，審計署早前亦發表報告狠批廉署巧立名目逃避開支限制，同時亦揭露湯顯明花費廿二萬元公帑購買紀念品送畀各地官員，真係使公帑唔使本。有立法會議員就趁審議來年財政預算案開支，迫使廉署交代湯顯明在任期間嘅送禮及外訪清單，結果發現佢送嘅禮物包羅萬有，包括水晶廉署大樓模型、花坑石擺設、雕刻擺設、紀念筆、集郵冊及郵票套摺、圍巾、領呔、手錶，就連相機都送埋。不過，奇就奇在大部分禮物都係送畀內地政府部門同官員，莫非廉署到訪內地時都要入鄉隨俗，跟隨內地嘅送禮文化？