有年齡限制及須具大學學歷
要參加呢次訪問計劃需要過五關斬六將，皆因歐盟要求參加者最好係廿五至四十五歲，相信七十位議員已經有三分一即時被「叮」走。參加者亦要曾經到訪歐盟國家，但日常公務又唔可以涉及歐盟事務，更甚嘅係議員要有大學學歷，同至少能夠以其中一種歐盟語言溝通，所以中學畢業嘅議員又輸喺起跑線上，無緣歐訪喇。
其實呢個訪問計劃目的模糊，同香港嘅關係亦唔大，議員更加好似參加「生還者」咁，要經過歐盟嘅重重試練，訪問回港後更要喺四星期內，向歐洲委員會提交詳細報告，所以即使歐盟資助議員嘅經濟客位來回機票及食宿津貼費用，一眾喺香港歎慣、又有秘書處同事服侍嘅議員，就算合資格都未必想參加喇，連抽籤都慳番。