政情：橄欖隨口噏遭圍攻
西九文化區管理局之前向外國收藏家收購超過一千五百件中國當代藝術品惹起議爭後，尋日立法會一個委員會上掀起激烈討論。議員陳鑑林（橄欖）突然充當「藝術品鑑賞員」，直言「凡係不雅、淫褻，甚至有政治成分、侮辱成分嘅藝術品，都唔屬於藝術品」。呢番言論唔單止被西九Ｍ＋博物館行政總監李立偉還擊，以團隊辭職來對抗收購自主被干預，橄欖更被網民狠批佢唔識藝術。
被指干預表達自由
呢一批花成十五億元收購嘅藝術品中，包括內地維權藝術家艾未未嘅作品，有泛民主派議員發言時就話擔心西九策展人會面對來自各方嘅壓力，要求西九團隊確保藝術上獨立自主。不過，橄欖就突然大發偉論，話雖然藝術係要表達自由，但「自由兩個字唔係突然喺天度爆出來，係經過人去揀選」，仲認為不雅、淫褻、有政治性及侮辱性嘅藝術品，都唔屬於藝術品，希望西九管理局要小心衡量。
橄欖呢番言論一出，議會內外都引起回響，李立偉回應話，如果冇表達自由，好難做到成功嘅博物館，仲話佢哋唔會自我監控，如果有壓力，以佢為首嘅團隊都唔會願意留低。
唔少網民亦對橄欖嘅言論議論紛紛，有人話佢不知藝術為何物，有人更話：「那大衞像都非藝術品了。」