政情：康叔捉鬼港英餘孽冇碇匿
正當大家仍就特首選舉政改方案及「佔領中環」行動爭議不斷，前港區全國人大代表吳康民（康叔）除咗話佔中行動部署周密，相信有國際背景外，又為大家拆解以前港英政府點樣透過培養「親英勢力」，等回歸後繼續對香港興風作浪。康叔就指「民主阿婆」前政務司司長陳方安生，就係港英餘孽嘅第一梯隊，一度被視為港英培養嘅特首不二之選。康叔又狠批有政黨喺特首選舉投白票嘅「反骨」舉動，暴露咗佢哋港英餘孽嘅真面目添！
康叔尋日喺報章發表以題為「不可輕視英國在香港的潛勢力」嘅文章，認為唔少人喺回歸後，都忽視咗英國人同港英餘孽潛藏嘅影響力。康叔指出，港英政府早喺八十年代已積極培養佢哋嘅「代理人」，部分更加入負責英國特務情報工作嘅軍情六處（MI-6），形成一股「親英勢力」，至今仍經常來港活動，並在財團機構掛職。事實上，呢股勢力每逢香港出現重大政治事件，都會出來說三道四。
康叔又將港英餘孽分為四個梯隊，好似民主阿婆就係第一梯隊代表人，所以喺第一屆特區政府就穩坐第二把交椅，可惜民主阿婆唔生性，康叔形容呢個人「恃才傲物，沉不住氣，終於自我爆炸，錯失良機」，又話佢「不甘寂寞，常常出場表演」，即使「力圖成為泛民主派共主」，亦氣數已盡。康叔接受我哋訪問時仲直斥民主阿婆已經係「伯爺婆」，唔好再不自量力喺度搞搞震。民主阿婆面對指控，只拋低一句「no comment（冇意見）」，但「不甘寂寞」嘅佢又預告今日會成立推動民主嘅組織。
斥有政黨投白票促致流選
民主阿婆同港英政府關係親密人所共知，但康叔不點名指有政黨幾個高層，喺去年特首選舉公然主張投白票促致流選，暴露咗佢哋第二梯隊嘅真面目。當日有份投白票嘅自由黨榮譽主席田北俊否認自己係港英餘孽，仲喺社交網站貼圖，斥責指控係「文革式的批鬥論調」，又指康叔講法唔代表中央喎。佢話，雖然自己喺外國讀書，中文唔好，但唔代表係港英餘孽，又話連英國駐港領事都唔識。康叔反駁田少話自己只係書生論政，絕非文革式批鬥，又話只係田少對號入座。
至於第三、第四梯隊，康叔分別形容佢哋係「猶抱琵琶半掩面」甚至「隱藏不露」嘅人，仍然「長期埋伏，以伺時機」，睇嚟港英餘孽不但梗有一個喺左近，直頭係後繼有人、千秋萬代，無時無刻喺香港搞風搞雨。最近有前高官一上任即被翻舊帳惹官非，康叔質疑，究竟呢筆陳年老帳點解無端端會被挖出？佢直指英國人「善於抓住一些人的辮子，作為來日死心塌地為他們服務的『緊箍咒』」，當你唔聽話就會爆你私隱，成為佢哋嘅「撒手鐧」，佢估計爆大鑊陸續有來，仲話：「稅務局並非稅務局咁簡單，做生意嘅人，要捉佢哋嘅痛腳唔係太難！」