中環出更:陳振彬帶挈舊同學贏錢

身兼青年事務委員會主席嘅觀塘區議會主席陳振彬(Bunny),今年「升呢」做埋港區全國人大代表,固然比以前更忙,但依然會抽時間同一班小學同學定期聚會。卓妮日前就喺沙田馬場見到佢同幾位書友仔食飯敍舊,順便投注碰碰運氣,最終帶挈大家贏筆小橫財。

馬場敍舊 做定功課

Bunny憶述,佢小時就讀位於九龍城區嘅耀山學校,眨吓眼已經係四十幾年前嘅事。佢笑言,當年嘅校園生活過得好開心,畢業後仍對母校念念不忘,所以就去咗做舊生會會長,往後幾乎所有嘅舊生聚會,都係由佢一手一腳去策劃及統籌。佢話當中有幾位同學已經移咗民,但每隔一至兩年嘅同學聚會,佢哋都千里迢迢專程返港參與。

做得會長,Bunny當然做足晒工夫,早兩日已經努力刨馬經,為同學仔提供賽馬貼士,最終都冇令到大家失望,個個都有收穫,皆大歡喜。

第一手消息請下載on.cc東方互動iPhone/iPad/Android/Windows Phone Apps