中環出更：金紫荊女企業家不讓鬚眉
今時今日女性好有創業精神，好似早前成立嘅金紫荊女企業家協會，就加入咗好多事業型叻女，除咗創會主席何綺蓮、第一常務副主席彭芷君（Gigi）外，仲有家族做鞋履生意嘅姊妺花鄺紫凌及鄺韻凌、地產集團太子女藍嘉兒，佢哋都擔任副主席。當日女士氣勢如虹，到賀嘅一眾政商界男人頓時變成配角。
彭冲夫婦到場撐女
港協暨奧委會秘書長彭冲夫婦亦有到場，唔使問，梗係去為愛女Gigi打氣啦。Gigi兩年前跟隨心胸外科專家老公辛光耀移民加國，經常港、加兩邊走，今次亦係專程返港出席就職禮。Gigi喜孜孜話，老公去加國做研究嘅兩年合約話咁快屆滿，預計八月就可以返港定居喇。
最近香港青聯常務副主席霍啟剛太太郭晶晶傳出孕事，成為城中熱話，卓妮趁機問彭冲，佢嘅多年拍檔港協暨奧委會會長霍震霆係咪就嚟做爺爺？彭冲笑笑口話，佢都好想知，仲叫卓妮去問霍老爺喎！至於美國波士頓馬拉松比賽遇上爆炸事件，港協會唔會呼籲港人避免參加國外大型賽事？佢話全球各地政治動盪各有唔同，咩事都有可能發生，驚唔到咁多。
醫院管理局主席胡定旭（肥胡）亦有到場，最近H7N9疫情喺華東擴散，雖然香港仍未發現病例，但係肥胡都有段切身難忘經歷。事關三月底南京市宣布第一宗病例時，肥胡正身處南京同朋友食緊飯，聽到消息後，認真食不知味。卓妮問佢係咪食緊雞，佢諗咗幾秒鐘，話唔記得咗喎！
卓妮