大家知唔知剛剛過去嘅四月二十二日係乜嘢日子？呢一日係一年一度嘅「世界地球日」，今年嘅主題係「氣候變遷面貌」，目標係為氣候改變而努力。世界地球日興起於七十年代嘅美國校園，九十年代從美國走向世界，成為環保主義者嘅節日，家陣有超過十億人參與相關活動，呼籲地球村村民眾志成城共同保護環境。
保護環境其中一個方法係減少製造廢物，或者將廢物攞去循環再造。之但係好可惜，香港每日製造嘅廢物簡直排山倒海一樣，若然全部送去堆填區，幾年之內就會填到飽和。點算好呢？好彩嘅係，外號「氣候逃犯」嘅前特首曾蔭權已經執包袱落台，唔好彩嘅係，掹住新特首衫尾上台嘅現任環境局局長黃錦星似乎冇乜料到。
黃局長左度右度，終於度出一條環保大計，叫做「玻璃樽徵費措施」，初步構思係政府向飲品供應商徵費，每個一公升玻璃樽收一元，以招標形式委聘玻璃管理承辦商，負責收集廢棄飲品玻璃樽，並且轉化成可再用物料，例如鋪路嘅環保磚之類，由徵費支付運作成本。
聽落呢條計仔算係有得諗，問題係港式官老爺有一個特點係思慮不周，經常好心做壞事。立法會環境事務委員會討論玻璃樽徵費措施嘅時候，香港環境保護協會主席樊熙泰就質疑嘞，諮詢報告冇充分解釋玻璃樽回收之後可以點樣處理，如果只係循環再造成環保磚，仍然會有好多廢樽用剩，情況好比政府有意循環再造建築廢料，但係建築廢料多到用唔晒，最後照樣運去堆填區，無法達成預期效果。所以咯喎，樊熙泰促請政府詳細研究各種玻璃廢料嘅可再生用途。
玻璃樽未必有出路固然係一個問題，樊熙泰仲話呀，政府必須小心考慮有冇足夠誘因鼓勵業界使用回收玻璃樽製造嘅環保磚。另一個問題就係，如果回收價太高，唔會有人用玻璃樽製造環保磚。
簡單咁講，回收唔容易，再造唔容易，使用唔容易，呢一條環保之路將會荊棘滿途。
其實計功夫茶話齋，玻璃樽徵費措施仲有一個思慮不周嘅地方，如果香港冇足夠嘅玻璃樽收集箱，市民隨手就將玻璃樽丟落亂七八糟冇分類嘅垃圾桶，試問又點樣回收呀？垃圾分類都未做好，回收廢物嘅工作只會事倍功半o架咋！
所以咯喎，功夫茶懇請黃錦星盡快戒甩「官頭豬腦」嘅壞習慣，切切實實想辦法搞好垃圾分類，再配合有效率嘅回收廢物以及循環再造，咁先至係保護環境救地球嘅應有之道。若然繼續傻傻更更冇料到，「世界地球日」變成「世界滅亡日」就唔好啦！