著名兒科醫生李家仁憑一曲《小明上廣州》而紅爆全港，並已先後推出咗N個改編版本，「小明」幾乎全世界都去勻。尋日佢為咗提倡環保，喺網上推出全新歌曲《慳水進行曲》，中港兩地同日上網，連卡拉OK版都有埋。
「小明」李家仁喺MV中繼續扮鬼扮馬，一時穿上金色背心，拿住電結他自彈自唱，一時又着住底衫，喺地下放滿水桶，模擬排大長龍輪食水，再加插一啲六、七十年代，全港大制水嘅真實歷史畫面，提醒市民必須珍惜食水。「小明」喺MV中，提醒大家啲水用過可以再用，喺漱水同洗菜時，切記關水喉避免水長流，浪費食水。總之提出好多方法，叫大家一齊慳水。
