政情:福建幫聲稱唔怕重劃區界

我哋早幾日前寫過,政府有意重劃東區同灣仔區議會嘅區界,隨時將以北角為核心嘅福建幫勢力一分為二。不過有福建幫中人同我哋講,其實福建幫喺香港嘅勢力早已衝出北角,遍布港九新界,劃界建議對佢哋影響不大,但原來呢個「擴展版圖」行動,並非佢哋有心部署嘅結果。

在港百一萬人 僅次廣東人

香港廣東人最多,估計有超過五百萬,第二多就係福建人,估計約有一百一十萬。全港過百萬福建人當中,最多當然係住喺俗稱「小福建」嘅北角區,中西區亦有唔少,但原來好多遠至新界嘅新社區,依家都有好多福建人,例如將軍澳同屯門等,原因係呢啲地區有好多新建公屋,唔少新來港或受舊區重建影響嘅福建人,陸陸續續都搬咗去住,大家同聲同氣,好快又聚集埋一齊搞活動,變相幫福建幫擴展版圖。

福建幫中人又話,福建人向來着重自力更生,寧願辛苦啲打幾份工幫補家計,都唔肯認窮伸手等人幫,因此聯會曾經搞扶貧運動,但反應冷淡,個計劃後來改名為「幫助有所困難人士」,內容包括資助啲福建子弟升學,鄉親嘅反應至較為熱烈。

第一手消息請下載on.cc東方互動iPhone/iPad/Android/Windows Phone Apps