政情：曾浩輝歎世界未諗復出
九七年起嘅多場疫症，香港逐漸成立咗一個抗疫團隊，前衞生防護中心總監曾浩輝都係團隊其中一名成員，不過自從佢去年底以私人理由辭職之後，已經好少喺公開場合出現。日前喺仁濟醫院活動上見到佢，曾醫生除咗一頭黑髮變咗灰白色之外，精神睇嚟唔錯。曾浩輝話，退下火線後到處旅遊同埋陪屋企人，好享受咁鬆弛嘅生活，暫未諗住將來做乜嘢喎！
雙疫拍門 關心舊同僚
以前逢親有流感或傳染病，就會見到曾浩輝第一時間出嚟交代進展，最近H7N9禽流感疫情快速擴散，市民或者會諗起喺一群防疫醫生之中，就係唔見咗曾浩輝。曾浩輝笑稱，唔知算唔算好彩，佢離開官場後先後爆發咗新沙士及H7N9疫情，佢唔使再頻撲抗疫，不過佢好關心舊同事，唔知佢哋忙成點。
曾浩輝現年四十六歲，冇理由就咁退休，佢積累咗咁多經驗，從此退出江湖都好嘥。問佢有冇諗過自己開診所，或者復出加入其他機構，佢笑稱仲未抖夠，暫時未諗過呢個問題，佢嘅專業係公共衞生，就算重出江湖，睇嚟都係公共醫療機構啱佢多啲。