政情：李應生籲勿亂服板藍根
內地爆發致命率高嘅H7N9禽流感，又再傳中藥板藍根可以防治禽流感，於是又出現一股搶購潮。不過香港中藥業協會理事長李應生話，板藍根雖然可以清熱毒，但能否有效防治還須要視乎其他嘅因素，所以服食之前最好搵中醫把吓脈咁話。
李應生話中醫係講求氣血臟腑等各方面嘅調和，從而達致卻病健體之效。故此利用板藍根嚟防治禽流感，應先由中醫師判斷服用者嘅體質，然後再同其他藥材配合以發揮療效。其實中醫同西醫嘅醫學理論差別好大，故此唔應該用「頭痛醫頭」嘅西藥觀念嚟看待板藍根。
已增多種解表藥進口
雖然今次爆發禽流感疫情係千里之外嘅華東，但李應生話明白港人有防疫失守嘅憂慮，為此佢經已增加板藍根等多種解表藥嘅進口，力求穩定售價同埋避免出現好似奶粉荒嘅狀況。佢又話目前嘅疫情未算太嚴重，因為香港目前未有病例，而H7N9亦未有證據可以人傳人，炎夏漸至，禽流感病毒未必適應高溫，所以大家唔使咁擔心。