中環出更：陳肇始處女唱 善款紛至
慈善團體董事局換屆嘅接力賽已近尾聲，早前輪到仁愛堂。新任主席陳鄭玉而（Connie）喺黃達東手中接下火炬，並將董事局成員擴大到四十位，淨係副主席都有一打咁多，認真墟冚。新班子一上任就急不及待籌款，就職晚宴變身慈善騷，食物及衞生局副局長陳肇始（Sophia）獻出第一次，拍住Connie連唱兩首歌，台下善長踴躍捐款，Sophia笑不攏嘴。
Sophia話，今次係首次公開喺台上唱歌，佢小時候係合唱團成員，多數係成班人一齊唱，冇今次咁搶眼，但諗到係為慈善而唱，就冇乜所謂喇！Sophia喺合唱團係唱高音，當晚與音色低沉嘅Connie合唱，反而唔係聽得咁清楚Sophia把聲，睇吓下次邊個善團可以打動Sophia，飲邀得佢獨唱嘅頭啖湯？
名人齊賀仁愛堂換屆
當日到賀嘅賓客多到爆，台北經濟文化辦事處處長朱曦亦去支持台灣鄉親羅台秦升呢做副主席，羅台秦老公中華廠商聯合會常董戴澤良亦捐出一百萬元畀仁愛堂，以實際行動支持太太做善事。新界鄉議局主席劉皇發做醫生嘅細仔劉業光，今屆係新丁總理，發叔舉家出動撐場。當年有份創辦仁愛堂嘅發叔話，一家七口除咗大女之外，個個都入過董事局。
前仁愛堂主席顏寶玲及張心瑜都有到場，佢哋對仁愛堂感情好特別，事關十年前顏寶玲接任主席時，正係○三年爆發沙士，同年張心瑜亦加入做總理。
張心瑜話，記得董事局喺四月份就職時，疫情仍未受控制，一眾董事局成員齊戴口罩及白手套，加上滿室戴住口罩嘅賓客，場面十分難忘。
卓妮