政情2.0：今日你上鏡：退休寫書
立法會前秘書長吳文華（Pauline）退休後生活依然忙碌，閒時去旅行做義工之餘，仲要抽時間幫立法會寫《立法會會議程序手冊》，詳述過往開會嘅慣例同議會運作程序。Pauline上星期五出席一個籌款晚宴時話活動太多搞到自己暈陀陀。佢一月中已經開始寫書，但自言進度非常緩慢，寫嚟寫去都係得幾個chapter（章節），講笑話真係唔知幾時先可以寫得完。
上年立法會審議出缺安排時通宵開會，Pauline話秘書長雖然唔使喺議事廳坐足全程，但秘書處亦都冇輪更制度等佢可以返屋企瞓覺。至於會唔會向秘書長陳維安傳授兩招開「長命會」秘訣，佢話秘書處有豐富經驗，叫大家唔使擔心咁多喎。