政情2.0:廢腑之言:鬍鬚曾港版「狼來了」

財政司司長曾俊華(鬍鬚曾)年年估錯政府盈餘,明明係庫房水浸都畀佢講成政府乾塘,出口術基本上成為佢嘅例牌動作,鬍鬚曾尋日再度喺網誌靠嚇,狂數影響香港經濟的國內外因素共有七大項,由意大利、塞浦路斯到北韓,甚至國際貨幣基金組織都畀佢擺上枱。鬍鬚曾又變身成天氣報道員,話呢七大因素令佢有「山雨欲來」嘅感覺,所以政府要做好穩健財政儲備同經濟實力,以免政府受到外圍經濟因素影響喎。

基本上一個地球咁多個國家,好難無事發生,鬍鬚曾總係要搵極端例子來製造恐慌,悲觀主義至上,香港市民遲早會嫌棄佢。

既然真係「山雨欲來」,政府更要做好防風措施啦,而唔係一味靠嚇,亦唔係累積財政盈餘就能夠解決到。佢咁做只反映除咗出口術之外,佢無咩實質嘢識做。鬍鬚曾次次都靠嚇,最後只會令到市民麻木,並無晒危機感。唔知讀番書嘅財爺,有無聽過「狼來了」呢個故事?

第一手消息請下載on.cc東方互動iPhone/iPad/Android/Windows Phone Apps