政情：小肥張談舊史 與郭偉強拉關係
工聯會勞工界立法會議員郭偉強地區辦事處尋日開張，勞工及福利局局長張建宗（小肥張）、政制及內地事務局副局長劉江華等高官都有到賀。小肥張喺致辭時話同郭偉強識咗唔算太耐，可能要拉關係，佢將自己曾做過東區民政主任嘅陳年舊事都講埋，話自己當年經常喺鰂魚涌、筲箕灣一帶活動喎。
上樓驚「拍烏蠅」
郭偉強話自己一直想喺地面開辦事處，不過鑑於位置便利兼價錢相宜嘅心水地舖確實難搵，佢於是轉向高空發展，經過兩個幾月嘅努力，終於喺筲箕灣一棟大廈嘅九樓搵到舖位，七百幾呎每月租金盛惠萬四蚊。不過九樓咁高，啲街坊會唔會唔識得摸上門而搞到議辦「拍烏蠅」o架？郭偉強自己都有諗過類似問題，所以惟有叫職員多啲落街宣傳招攬生意。
郭偉強依家仲喺理工大學讀緊三年制社會政策及行政學位課程，每星期要上兩晚堂。拉布戰重臨，立法會下星期幾乎日日要朝九晚十開會，郭偉強話為咗唔想走堂，可能要勞煩其他黨友辛苦啲幫佢頂住先，而佢就會開早會補番數。