政情：議員做「地獄廚神」
立法會議員個個都身兼數職，平日開完會都已經夜晚，相信無邊個有精力返屋企下廚煮幾味。尋日扶康會邀請咗九位立法會議員同智障人士合作煮餸，就搞到平時英姿凜凜嘅立法會議員，個個變晒雞手鴨腳咁。當中「地獄廚神」首推民主黨黃碧雲，佢竟然用茄汁炒蘋果同牛肉，最尾仲要加埋胡椒粉，酸、甜、鹹、辣咩味都有，食落口嘅人真係有苦自己知。
賣相好啲 陳恒鑌勝出
帶埋囡囡同太太嚟打氣嘅工聯會鄧家彪，就唔知係咪太緊張，竟然煮到過晒龍，又猛落茄汁，最尾畀評判話佢碟餸似足雜果賓治。比賽最後由民建聯陳恒鑌勝出，佢話自己無諗過贏。負責試食畀分嘅周中師傅話，其實位位議員嘅質素差唔多，只係陳恒鑌碟餸擺得靚啲。
比賽已去到第九屆，上年都有參加嘅民主黨主席劉慧卿話，自己每年落廚一次，每次就係為咗呢個比賽，好在今年有黃碧雲陪佢墊底，唔使咁驚。其他參賽議員當然笑料百出，立法會主席曾鈺成開頭係威係勢，識得用油爆香洋葱，撈起備用再炒牛肉，點知畀評判話佢炒得過老，只啱老人家食。