政情：黑英致辭 紅姑支持
前天文台台長林超英（黑英）向來奉行綠色生活，尋日佢又坐言起行，出席香港地球之友喺馬鞍山郊野公園舉行嘅「綠野先鋒」植樹遠足挑戰賽，萬人迷紅姑鍾楚紅都以素顏撐場。黑英唔算靚仔，但勝在博學多才，難怪佢致辭時，紅姑都報以情深款款眼神。
咪睇紅姑平日花枝招展，離開水銀燈下，佢崇尚低碳生活，仲係慳妹一名，佢話每當睇完電視或玩完電腦，都會熄機，唔會將佢哋設於待機狀態，話咁做慳番唔少電喎。紅姑又關注路邊空氣污染嚴重，慨嘆汽車排放太多污染物，搞到個天成日灰蒙蒙，走喺街上又焗又辛苦，希望大家幫手植樹，齊齊改善空氣質素。
去年山火地帶再植林
黑英都感同身受，尋日幫手種埋一份。佢話，植樹有助改善氣候暖化，不過種完樹後，要確保樹苗能健康成長，咁先可以吸收二氧化碳釋出氧氣，達致調節氣候之效。所以鼓勵植樹者定期上山，（目及）吓自己所種嘅樹喎。講番個植樹活動，旨在為馬鞍山公園附近一幅喺去年重陽節被山火燒去大範圍林木嘅山坡，重新植林，吸引八百人參加。