政情：曾鈺成放定風剪布

預算案拉布有機會令政府運作陷入癱瘓，後果非同小可，為咗同拉布議員劃清界線，泛民主派已經撤回所有修訂，民建聯尋日亦都喺全港十八區發起反拉布保民生簽名行動，譴責拉布議員不負責任，令電費補貼、向關愛基金撥款等紓困措施受阻。曾鈺成尋日出席活動後都話，雖然人民力量黃毓民及陳志全已經撤回小部分有技術性錯誤嘅修正案，但仍然有七百幾項獲批。不過佢認為同上次相比，今次修正案主要圍繞減司局長人工，內容較為簡單，預計議員唔可以再好似上年咁不斷長篇發言。

曾鈺成又引述政府意見，話如果立法會五月中仍然未通過正式撥款，政府運作會大受影響，所以佢唔可以容許辯論無休止拖延。佢之後仲加重語氣，話如果發現辯論已經進行咗一段時間，而又冇結束嘅迹象，佢會毫不保留採取剪布措施，幾日以來，佢不斷加強剪布的「意圖」。

黃宜弘曾經唔睬曾鈺成

不過講番上年通宵審議出缺機制，雖然當時有人懷疑上屆代表中總嘅黃宜弘同曾鈺成互扯貓尾協議「返嚟就郁」，但其實原來黃宜弘對曾鈺成不瞅不睬好耐。事緣行政管理委員會去年初開會，討論喺民主黨李華明同社民連梁國雄（長毛）之間揀一個代表立法會外訪，時為行管會成員嘅黃宜弘擔心長毛言行會失禮立法會，於是支持當時係內會副主席嘅李華明代表立法會出席。曾鈺成最後決定抽籤，竟然抽中長毛，黃宜弘於是連曾鈺成都唔睬，直至去年剪布後至改觀。