中環出更：蔡關穎琴帶三子賣獎券
女童軍要日行一善。啱啱升呢做副會長嘅蔡關穎琴都身體力行，早前帶埋三位公子喺商場賣獎券，初次走入玩具店逐張逐張Sell，賣足幾粒鐘無停手，認真唔話得。
三小時賣出150張
擔大旗為慈善獎券籌款做籌委會主席，蔡太落力發功。利豐集團主席馮國經太太夠晒老友，二話不說借出旗下十多間連鎖玩具店，方便班女童軍入去賣獎券。蔡太就帶住囝囝「進攻」將軍澳其中一間分店，入到去後，兵分幾路出擊。
三位公子平日好斯文，未試過「Sell嘢」，見媽媽咁落力，都Sell埋一份，企足三粒鐘未放棄，最後合力賣咗一百五十張，成績唔錯。蔡太話，今次旨在訓練囝囝膽量，數量唔重要。轉過頭，佢再私人「科水」掃入大批獎券，為善最樂。
太子珠寶鐘錶主席鄧鉅明太太鄧宣宏雁（Emily）都落力Sell埋一份，事關佢係今次活動嘅籌委會副主席，Emily嘅口才了得，喺佢三扒兩撥之下就賣晒啲獎券，仲拎埋個最支持機構最佳銷售獎亞軍添。