中環出更：馮國經徐立之 老友歎咖啡
摯友之間，就算幾忙都好，都總會抽啲時間見吓面，聯絡吓感情。早前一個下晝，卓妮行經中環歷山大廈，見到利豐集團主席馮國經同香港大學校長徐立之兩個大忙人，坐喺一間餐廳內，一邊歎咖啡一邊高談闊論，坐足接近一粒鐘至離開，臨別前仲深深地握手道別，睇嚟交情不淺。
當日下午三點左右，卓妮經過唔少名人都鍾意光顧嘅歷山大廈COVA餐廳，見到馮國經同徐立之兩個人忙裏偷閒，坐喺近住走廊、位置較開揚嘅四人枱歎下午茶。佢哋冇叫到嘢食，只係柯打咗兩杯咖啡慢慢歎。
馮國經○二年卸任港大校董會主席，徐立之啱啱喺同年做校長，兩個人前後腳喺港大任要職，估唔到都咁老友。
好有默契 冇爭埋單
坐到咁上下，兩人見時候不早，就舉手示意侍應埋單。馮國經主動掏荷包畀錢，身旁嘅徐立之冇搶住埋單，反而用手托住個腮，靜靜咁等對方找數，好有默契。離座之前，二人依依不捨，好用力咁握住對方隻手道別。卓妮記得馮國經嘅辦公室就喺歷山大廈，所以徐校長先送對方搭升降機上樓，然後一支公離開。
卓妮上前同徐校長打招呼，問佢哋頭先喺度傾緊啲乜嘢大計？佢就話冇乜特別話題，天南地北乜都講一餐喎。佢仲話自己同馮國經係老朋友，一向都有定期見面，見大家都鍾意飲咖啡，所以咪約喺呢間餐廳見面囉。
卓妮